［黃之鋒和他的午後之紅茶］
星期三中午，約了之鋒在他覺得「金鐘最好食」茶餐廳等．午市大牌檔要做幾轉，我和攝記兩個人霸四人枱，等之鋒來．辦公室啲人放飯時間，人山人海，阿姐見我們兩個茂李淨飲兼生人霸死地佔據大枱已經鞋口鞋面，叫我們轉張細枱，我向之鋒發短訊，「阿姐鬧了！」之鋒說正趕過來，佢真係比以前有交帶咗．我體諒的，畢竟出監之後，佢車輪轉做咗十幾個訪問，係好辛苦．
佢一到，阿叔即刻笑哂，無人再炳我地．我地傾足三粒鐘．監房沒令之鋒的腦袋銼鈍，他的轉數和以前一樣快．他一向諗嘢快過個口，說話依然跳躍，句句都是笑料．
我曾經擔心牢房會把他折磨成另一個人，但至少今次他仍然是那個之鋒，更難得的是，他比以前更「貼地」，能與草根的囚友共處，除了說話粗鄙咗少少（坐完監未調校回原來狀態），也未有失卻自己．
吃完飯，他趕着去荃灣做另一個訪問，走之前在大牌檔留下了一個空瓶，是一枝日本飲品「午後之紅茶」．
之鋒說，監房裡飲品沒選擇，茶包泡足兩個星期，所以茶無人飲，兩個月只係飲水解渴．他坐牢六十九日之後，出來去七仔買飲品，忽然有種焦慮，覺得太多飲品陳列出來，不知道揀甚麼．
之鋒出監之後做了十七個訪問，而我的文章，是最遲才出街的一篇．我有機會讀完其他媒體寫的之鋒．我開始明白之鋒入了七仔那種感覺，之鋒句句都是bite，記者也會面對選擇困難症，我也不例外．大部份人都未曾坐過監．面對一個放監出來的人，他口中說的一切都是新奇．但我隱隱感覺到，要調整自己的心態．
我開始上網搜查香港監獄生活的資訊，我閱讀大量囚友寫的筆記，我開始明白「坐監」是一回怎樣的事．我被監獄的術語洗腦：在荔枝角收押叫做「拋」，判咗邊個倉叫「過界」，監獄裡自慰叫「落night」，坐牢常客叫做「黑手」，親友探監叫「拜山」．
囚犯生活是怎樣：朝早六點半起身等出倉，食完早餐集體活動，午餐之後下午才可以有親友探，到晚飯後幾小時才是「自由活動」，睇電視寫下信．太平紳士來巡倉囚犯懲教乾等連尿都無得痾．囚衣未判之前一種顏色，判咗之後至啡色，囚衣不會有褲袋，等你無得收埋隻手扮有型又好收埋武器都好．
我開始讀懲教署的「囚犯需知」，我感應到懲教職員工作枯燥苦悶，明白散仔幾十年對住班犯返工放工的壓抑．我知道監倉三山五嶽，囚犯不少人渾渾噩噩，我明白管理囚犯也是不容易．也明白囚友和懲教那種既倚賴又互相厭惡的愛恨糾纏．
之鋒話囚友問佢「鑲唔鑲珠」，我上網翻查「鑲珠」是一件怎樣的事．原來囚犯會拿牙刷磨成珠子，自行在監獄裡「動手術」，把珠子埋入下體，增加性交的樂趣．我漸漸忘記自己是個斯文的讀書人，我開始想像「鑲珠」是一件平常的事，我完全投入了粗口橫飛的監獄世界，到了這個狀態，我知道，我就可以落筆了．
就是這樣，由訪問到刊出這段時間，我好似自己入咗去坐咗四日咁．最初我聽之鋒講嘢，句句都好新奇，但將自己「洗腦」成一個囚友之後，當我感到自己的心態已經「入咗監房」，此時要寫這個訪問，比較容易．
其實，黃之鋒就像一間「七十一」，佢一開口就有太多資訊畀我揀，我作為記者都面對一種選擇症候群，但將自己變咗做一個囚友之後，我就知道當我對住個擺滿野飲既雪櫃，點揀一枝我覺得要買既飲品了．
https://news.mingpao.com/…/ar…/20171105/s00005/1509817461334
Search